ތިލަފުށީގެ ދެވަނަ ފިޔަވަހީގެ ފުރަތަމަ ބައި ހިއްކާ ނިމިއްޖެ ކަމަށް އާބަންކޯ އިން މިއަދު ބުނެފި އެވެ.
އެ ކުންފުނީގެ ނޫސްބަޔާނެއްގައި ބުނީ ތިލަފުށީގެ ދެވަނަ ފިޔަވަހީގެ "އޭރިއާ ބީ" ހިއްކާ ނިންމައި، "އޭރިއާ އޭ" ހިއްކުމުގެ މަސައްކަތް މިހާރު ފަށާފައިވާ ކަމަށެވެ. ހިއްކާ ނިމުނީ 39.6 ހެކްޓަރުގެ ސަރަހައްދެއް ކަމަށް ވެސް ބުންޏެވެ.
ތިލަފުށީގެ ދެވަނަ ފިޔަވަހީގެ ބިން ހިއްކަމުން އަންނަނީ ތިން ސަރަހައްދަކަށް ބަހާލައިގެންނެވެ. އެއީ އޭރިއާ އޭ، ބީ އަދި ސީ އެވެ.
"އޭރިއާ އޭ" ހިއްކުމުގެ މަސައްކަތް އަންނަ އަހަރުގެ ފެބްރުއަރީ މަސް ތެރޭގައި ނިންމާލެވޭނެ ކަމަށް އެ ކުންފުނިން ބުންޏެވެ. އެރިއާ އޭގެ ގޮތުގައި ހިއްކުމަށް ހަމަޖެހިފައި ވަނީ 71.5 ހެކްޓަރުގެ ސަރަހައްދެއް ކަމަށް އާބަންކޯގެ ބަޔާނުގައި ބުންޏެވެ.
ތިލަފުށީގެ ދެވަނަ ފިޔަވަހީގެ ގޮތުގައި ހިއްކަނީ 151 ހެކްޓަރުގެ ސަރަހައްދެކެވެ. މި ޕްރޮޖެކްޓަށް ހަރަދުވާ ވަރެއް އާބަންކޯ އިން ނުބުނެ އެވެ.
މާލެ ސަރަހައްދުގެ އިންޑަސްޓްރިއަލް ހަބްގެ ގޮތުގައި ތަރައްގީކުރަން ނިންމާފައިވާ ތިލަފުށީގެ ދެވަނަ ފިޔަވަހި ހިއްކުމުގެ އަމަލީ މަސައްކަތް ފެށީ މިދިޔަ މާޗު މަހުގަ އެވެ.