އާސަންދަ މެދުކެނޑުމުގެ މައްސަލަ މަޖިލީހުން ބަލައިނުގަތުމާ ގުޅިގެން، އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވީ، ސަރުކާރުގައި މިކަމަށް ހައްލެއް ހޯދުމުގެ ހިތްވަރު ނެތް ކަމަށެވެ.
ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހެޅުއްވި މި މައްސަލަ ބަލައިނުގަތީ، ކުއްލި މައްސަލައެއްގެ ޝަރުތުތައް ފުރިހަމަނުވާ ކަމަށް ބުނެއެވެ.
"ރައްޔިތުންގެ މަޖިލީހަކީ ރައްޔިތުންގެ ކަންބޮޑުވުންތަކަށް އަޑުއަހައި، ހައްލު ހޯދަންޖެހޭ ތަނެއް. އެކަމަކު އާސަންދައިގެ މައްސަލަ ހުށަހެޅުމުން، ސަރުކާރުން އެއްވެސް ފިޔަވަޅެއް އަޅަން ބޭނުމެއް ނުވޭ،" ފައްޔާޒު ވިދާޅުވިއެވެ.
ފައްޔާޒު ފާހަގަކުރެއްވި ގޮތުގައި، އާސަންދައިގެ ޚިދުމަތް ފޯރުކޮށްދިނުމަކީ ޤާނޫނީ ގޮތުން ސަރުކާރުގެ ޒިންމާއެކެވެ. އަދި މި ޚިދުމަތުގައި ދިމާވާ އެންމެހައި ދަތިތައް ހައްލުކުރަންޖެހެނީވެސް ސަރުކާރުންނެވެ.
ކުޑޫގެ މައްސަލާގައި ފާހަގަކުރެއްވި ގޮތުގައި، މިއަހަރު ތެރޭގައި ގިނަ ރައްޔިތުންނަށް އާސަންދައިގެ ޚިދުމަތް ނުލިބި، އަމިއްލައަށް ޚަރަދުކުރަން ޖެހިފައިވެއެވެ. މީގެ ތެރޭގައި ޑޮކްޓަރަށް ދެއްކުމާއި، ޓެސްޓުތައް ހެދުމާއި، ބޭސް ނެގުން ހިމެނެއެވެ.
ޤާނޫނު އަސާސީގައި ރަނގަޅު ފެންވަރުގެ ޞިއްޙީ ޚިދުމަތް ލިބުމަކީ އަސާސީ ޙައްޤެއްގެ ގޮތުގައި ކަނޑައަޅާފައިވެއެވެ. އަދި އިޖުތިމާޢީ ޞިއްޙީ އިންޝުއަރެންސްގެ ޤާނޫނުގައި، އާސަންދައަށް މާލީ ދަތިކަން ދިމާވާ ހާލަތުގައި، މާލީ ވުޒާރާއިން އެކަން ހައްލުކޮށްދޭންޖެހޭނެ ކަމަށް ބަޔާންކޮށްފައިވެއެވެ.