ސޯޝަލް މީޑިއާގައި މުއިއްޒު ޕްރޮމޯޓުކުރާ އެކްޓިވިސްޓުންނާއި, ކޮރަޕްޝަންގެ ހުތުރު އަމަލު ހިންގާފައިވާ ވަގުންވެސް ސަރުކާރުގެ ސްޕޮންސަރޝިޕްގައި މިއަހަރު ހިލޭ ހައްޖަށް ގޮސްފައިވާކަން ހާމަވެއްޖެއެވެ.
މިހާރު ސޯޝަލް މީޑިއާގައި އާންމުވެފައިވާ ފޮޓޯތަކުން ހާމަވެފައިވާ ގޮތުގައި, ސިޓީތަކާއި ބެހޭ ވުޒާރާއަށް މުއިއްޒު އައްޔަން ކޮށްފައިވާ, ސޯޝަލް މީޑިއާގައި މުއިއްޒު ޕްރޮމޯޓްކުރަމުންދާ ރާޝިދު (ރާޑޯ)ވެސް ސަރުކާރުގެ ސްޕޮންސަރޝިޕްގައި ވަނީ ހިލޭ ހައްޖަށް ގޮސްފައެވެ. އަދި އޭނާގެ ހައްޖަށް ގޮސް ކުރަމުންދާ މައިގަޑި މަސައްކަތަކީވެސް މުއިއްޒުގެ ފޮޓޯތައް ސޯޝަލް މީޑިއާގައި ޕްރޮމޯޓްކުރުންކަން ވަނީ އެނގިފައެވެ.
އޭގެ އިތުރުން, ސޯޝަލް މީޑިއާގައި މިހާރު އާންމުވެފައިވާ ފޮޓޯތަކުން އެނގޭގޮތުގައި, ފިއުލް ސަޕްލައި މޯލްޑިވްސް (އެފްއެސްއެމް) ގެ މެނޭޖިން ޑިރެކްޓަރުކަމުގައި ހުއްޓާ ކޮރަޕްޝަންގެ ބޮޑެތި ތުހުމަތު ކުރެވިގެން އަމިއްލައަށް އިސްތިއުފާދިން އިސްމާއިލް ސުހައިލްވެސް ވަނީ ސަރުކާރުގެ ސްޕޮންސަރޝިޕްގައި ހައްޖަށް ގޮސްފައެވެ. އޭނާވެސް ފަހުން ވަނީ ސިޓީތަކާބެހޭ މިނިސްޓްރީގެ ސިޔާސީ މަގާމަކަށް އައްޔަން ކޮށްފައެވެ. މީގެ އިތުރުންވެސް މިސަރުކާރުން ޑެޕިއުޓީ މިނިސްޓަރުން ފެންވަރުގެ ގިނަ ސިޔާސީ މުވައްޒަފުންވެސް ވަނީ ހިލޭ ހައްޖަށް ގޮސްފައެވެ.
އޭގެ އިތުރުން, ނިކަމެތި އެތައް ރައްޔިތުން އެތައް އަހަރެއް ވަންދެން ހައްޖަށް ދިއުމުގެ ފުރުސަތު ނުލިބި ކިއުގައި ތިއްބާ, ޙައްޖު ކޯޕަރޭޝަންގެ އެމްޑީ ޝަކީލްގެ މަންމައާއި ބައްޕަ ކިއުގައި ނުޖެހި, މިއަހަރު ހައްޖަށް ގޮސްފައިވާކަންވެސް ވަނީ ހާމަ ވެފައެވެ.
"ދިޔަވަރު އޮންލައިން" އަށް މައުލޫމާތު ލިބިފައިވާ ގޮތުގައި ޙައްޖު ކޯޕަރޭޝަންގެ އެމްޑީ ޝަކީލްގެ މަންމައާއި ބައްޕަ މިއަހަރު ޙައްޖަށް ގޮސްފައިވަނީ މޯލްޑިވިއަންގެ ބިޒްނަސް ކުލާހުގައެވެ. އަދި ޝަކީލްގެ މަންމައާއި ބައްޕަ މައްކާގައި ހުންނަ ހޮޓެލްގައި ހިލޭ ރޫމް ހަމަޖައްސާފައިވާއިރު ތިބެނީ 26,000 ރުފިޔާގެ އަގުބޮޑު ކޮޓަރިއެއްގައެވެ. އަދި ހައްޖުގެ އަޅުކަން އަދާކުރަމުންދަނީ އާންމު ހައްޖުވެރިންނާއި ޚިލާފަށް, ވީއައިޕީ ފެންވަރުގައި ކަމަށްވެސް މައުލޫމާތު ލިބިފައި ވެއެވެ.
މިއަހަރުގެ ޙައްޖުގެ އަޅުކަން ވީއައިޕީ ފެންވަރުގައި އަދާކުރެއްވުމަށް ސަޢޫދީ ޢަރަބިއްޔާއަށް މުއިއްޒު މިހާރު ކުރައްވަމުން ގެންދަވާ ދަތުރުފުޅު ސޯޝަލް މީޑިއާގައި ޕްރޮމޯޓު ކުރުމަށް ޚާއްސަ މީޑިއާ ޓީމެއް މުއިއްޒުވެސް ވަނީ އެކުލަވާލާފައެވެ.
”ދިޔަވަރު އޮންލައިން“ އަށް މައުލޫމާތުދިން ރައީސް އޮފީހުގެ އިސް އޮފިޝަލަކު ވިދާޅުވީ މި ޓީމުގެ މަސައްކަތެއްގެ ގޮތުގައި ހަމަޖައްސާފައިވަނީ ރައީސް މުއިއްޒު ހައްޖުގެ އަޅުކަން އަދާކުރުމަށް ސައުދީ އަރަބިއާއަށް ކުރައްވަމުން ގެންދަވާ ދަތުރުފުޅުގެ ކަވަރޭޖް ހަދާ, އަޅުކަމުގައި ހޭދަ ކުރައްވާ މަންޒަރުގެ ފޮޓޯތައް ސޯޝަލް މީޑިއާގައި ޕްރޮމޯޓް ކުރުން ކަމުގައެވެ. އެގޮތުން އިއްޔެ ސައުދީ އަރަބިއާއަށް ވަޑައިގެންނެވުމަށްފަހު, މަދީނާގައި ހުންނަ މަސްޖިދުއް ނަބަވީއަށް ޒިޔާރަތްކޮށް މުއިއްޒު ނަމާދު ކުރެއްވި މަންޒަރުތައް މި މީޑިއާޓީމުން ވަނީ ސޯޝަލް މީޑިއާގައި ވައިރަލް ކޮށްފައެވެ.
އެނގިފައިވާ ގޮތުގައި ހައްޖުގެ މަތިވެރިއަޅުކަން މިބީދައިން އިސްތިހާރުކޮށް, މި މަތިވެރި އަޅުކަމުން ސިޔާސީ މަންފާ ހާސިލްކުރުމަށް, މިއީ ރާއްޖޭގެ ރައީސަކު މީޑިއާ ޓީމެއް އެކުލަވާލައިގެން މިއީ މި ބީދައިން މަސައްކަތްކުރައްވާ ފުރަތަމަ ފަހަރެވެ,
ސައުދީ ރޯޔަލް ކޯޓާގައި ހިލޭ ހައްޖު ކުރުމުގެ ފުރުސަތު ހޯއްދަވާ, ވީއައިޕީ ފެންވަރުގައި ހައްޖު ކުރެއްވުމަށް ކުރައްވާ މުޙައްމަދު މުޢިއްޒު އާއި އަނބިކަނބަލުން ސާޖިދާ ފުރާވަޑައިގެންނެވީ އިއްޔެ ހެނދުނުއެވެ.
މި ދަތުރުފުޅުގައި ރައީސުލްޖުމްހޫރިއްޔާގެ ދެކަނބަލުންނާއި، އަރިހުގައި ވަޑައިގަންނަވާ ވަފުދުގެ ބޭފުޅުން، ސަޢޫދީ ޢަރަބިއްޔާގައި ތިއްބަވާނީވެސް، ސަޢޫދީ ސަރުކާރުގެ ޚާއްޞަ މެހްމާންދާރީގައެވެ.
މި ދަތުރުފުޅުގައި ރައީސުލްޖުމްހޫރިއްޔާގެ ދެކަނބަލުންގެ އަރިހުގައި މިނިސްޓަރ އޮފް ފިނޭންސް އެންޑް ޕްލޭނިންގ މޫސާ ޒަމީރާއި މިނިސްޓަރ އޮފް ފޮރިން އެފެއާޒް ޑޮކްޓަރ ޢަބްދުﷲ ޚަލީލްގެ ދެކަނބަލުންނާއި، މިނިސްޓަރ އޮފް އިސްލާމިކް އެފެއާޒް ޑޮކްޓަރ މުޙައްމަދު ޝަހީމް ޢަލީ ސަޢީދު އާއި މިނިސްޓަރ އޮފް ސްޕޯޓްސް، ފިޓްނަސް އެންޑް ރެކްރިއޭޝަން ޢަބްދުﷲ ރާފިޢުގެ ދެކަނބަލުންނާއި، އިސްލާމީ މަރުކަޒުގެ އިސް އިމާމު ފަޟީލަތުއްޝައިޚް މުޙައްމަދު ލަޠީފްގެ ދެކަނބަލުން އަދި ޗީފް އޮފް ޕްރޮޓޮކޯލް، މުޙައްމަދު ޝަހުދީ ބައިވެރިވެވަޑައިގަންނަވައެވެ.
މުއިއްޒުގެ ދެމަފިރި ކަނބަލުން މިފަހަރު ކުރުމަށް ހަމަޖެހިފައިވަނީ ސައުދީ ރޯޔަލް ކޯޓާގައި ހިލޭ އެހީގައި ދޭ ހައްޖެއް ކަމަށާއި, ހައްޖުގެ ހުރިހާ ޚިދުމަތެއް ހުންނާނީ ވީއައިޕީ ފެންވަރުގައި ކަމަށް މުއިއްޒުވަނީ ވިދާޅުވެފައެވެ.
މުއިއްޒު ވިދާޅުވެފައިވަނީ ސާޖިދާއާއި އެމަނކުފާނުގެ ދެމަފިރި ކަނބަލުން މިފަހަރު ހައްޖަށް ވަޑައިގަންނަވާ ކަމަށާއި, އެ ދަތުރަކީ ސަޢޫދީ ސަރުކާރުގެ ފަރާތުން ދެއްވާ ޚާއްޞަ ދަތުރެއް ކަމަށެވެ. އަދި ދަތުރުގެ ހުރިހާ އިންތިޒާމެއް ހަމަޖައްސަވާ ދެއްވާފައި ވަނީ ހިލޭ ރޯޔަލް ކޯޓާގައިކަމަށް މުއިއްޒު ވިދާޅުވިއެވެ.
މި ޕްރޮގްރާމްގައި ވާހަކަ ދައްކަވަމުން މުއިއްޒު ވިދާޅުވީ މިފަހަރު ޙައްޖުގެ އަޅުކަން އަދާކުރައްވާ ހުރިހާ ދިވެހިންނަށްވެސް ހުރިހާ އިންތިޒާމެއް ހަމަޖައްސަވައިދެއްވާފައި ވަނީ ރަގަޅު ފެންވަރުގައި ކަމުގައެވެ. އެގޮތުން މައްކާ ރޫޓް އިނީޝިއޭޓިވްގެ ތެރެއިން ޙައްޖާޖީންނަށް މައްކާއަށް ދެވުމުން އެއާޕޯޓްގައި މަޑުކުރަން ނުޖެހި ސީދާ ހޮޓަލަށް ދެވޭނެ އިންތިޒާމް ހަޖެހިގެން ގޮސްފައިވާކަން ފާހަގަކުރެއްވިއެވެ. އަދި މިނާގައި ތިބުމަށްވެސް ވަރަށް ފެންވަރު ރަނގަޅު އިންތިޒާމް ހަމަޖެހިފައިވާކަމަށާއި، އަދި މައްކާއިން މަދީނާއަށް ދާނީވެސް ސީދާ ހައި ސްޕީޑް އެންމެ ރަނގަޅު ރޭލުގައި ދެތިން ގަޑިއިރު، ގާތްގަނޑަކަށް 2 ގަޑިއިރުތެރޭކަމުގައި އެމަނިކުފާނު ފާހަގަކުރެއްވިއެވެ.
ހައްޖުގެ އަޅުކަމަކީ, އިސްލާމް ދީނުގެ އެންމެ މާތް އެއް އަޅުކަމަށް ވާއިރު, މިމަތިވެރި އަޅުކަން ވީއައިޕީ ފެންވަރުގައި މުއިއްޒުގެ ދެމަފިރިން އަދާކުރައްވާ ވާހަކަ މީޑިއާ ޕްލެޓްފޯމް މެދުވެރިކޮށް މުއިއްޒު އިސްތިހާރު ކުރައްވަން ފެއްޓެވުމުން ގިނަ ބައެއްގެ ފާޑުކިއުން އަމާޒުވެފައިވާކަން ފާހަގަ ކޮށްލެވެއެވެ.