ރައީސް ޑރ. މުޙައްމަދު މުޢިއްޒުގެ ވެރިކަމުގެ ފުރަތަމަ އަށް މަސް ފާއިތުވެގެން ދިޔައިރު، އެ މަނިކުފާނުގެ ވެރިކަމުގެ ކާމިޔާބީ މިނެކިރުމަށް 26 ޖުލައިގައި ދެއްވި ތަގުރީރުގައި، ކެބިނެޓް ބައްދަލުވުންތަކުގެ އަދަދާއި ނިންމުންތަކުގެ އަދަދު ބޭނުންކުރެއްވި އެވެ. ނަމަވެސް، ޙަޤީޤަތުގައި ވެރިކަމެއްގެ ކާމިޔާބީ މިނެކިރަންޖެހޭނީ އެހެން ގޮތަކަށެވެ. އެއީ ރައްޔިތުންނަށް ލިބޭ ޢަމަލީ މަންފާއިންނެވެ.
ކުރީގެ ރައީސުންގެ ވެރިކަމުގެ ކާމިޔާބީތަކަށް ބަލައިލާއިރު، ގިނަ ޢަމަލީ މަސައްކަތްތަކެއް ފެނެއެވެ. ރައީސް ޔާމީނުގެ ވެރިކަމުގައި:
- ސިނަމާލެ ބްރިޖް އެޅުން
- ދަރުމަވަންތަ ހޮސްޕިޓަލް އިމާރާތްކުރުން
- ވެލާނާ އިންޓަރނޭޝަނަލް އެއަރޕޯޓުގެ އައު ޓާމިނަލް ތަރައްޤީކުރުން
- ބޮޑުތަކުރުފާނު މަގު ތަރައްޤީކުރުން
- ހުޅުމާލެ ފޭސް 2 ގެ މަޝްރޫޢު
ރައީސް އިބްރާހިމް މުޙައްމަދު ޞާލިޙުގެ ވެރިކަމުގައި:
- ހިލޭ ޑިގްރީ ޕްރޮގްރާމްތައް ތަޢާރަފުކުރުން
- ރާއްޖެ ޓްރާންސްޕޯޓް ލިންކް (އާރު.ޓީ.އެލް) ގާއިމުކުރުން
- ގިނަ ރަށްތަކެއްގައި ނަރުދަމާއާއި ފެނުގެ ނިޒާމު ގާއިމުކުރުން
- ބަނދަރު ހެދުމުގެ މަޝްރޫޢުތައް
- ވިލިމާލެ ބްރިޖް އެޅުން
- ހުޅުމާލޭގައި ފްލެޓު އިމާރާތްކުރުން
ރައީސް ސޯލިހުގެ ވެރިކަމުގެ އިތުރު ކާމިޔާބީތަކުގެ ތެރޭގައި:
- ބޭސްފަރުވާއަށް ރާއްޖެއިން ބޭރަށް ދިއުމަށް ސަރުކާރުން ދޭ އެހީތެރިކަން އިތުރުކުރުން
- ޕެންޝަން ފައިސާ އިތުރުކުރުން
- ކުޅިވަރު ދަނޑުތައް ތަރައްޤީކުރުން
- ޒުވާނުންނަށް ވަޒީފާގެ ފުރުޞަތުތައް އިތުރުކުރުން
- ޤައުމީ ޔުނިވަރސިޓީގެ ކެމްޕަސްތައް އިތުރު ރަށްރަށުގައި ޤާއިމުކުރުން
މިއީ ރައީސް ސޯލިހުގެ ސަރުކާތުން ކޮށްފައިވާ މަސައްކަތްތަކުގެ ތެރެއިން މަދު ކަންކަމެވެ. ކޮވިޑު މެނޭޖް ކުރައްވާ ރާއްޖެ ބަނގުރޫޓު ވިޔަ ނުދީ ހިފެހެއްޓެވީ ރައީސް ސޯލިހުއެވެ.
މި ހުރިހާ ކަމަކީ ރައްޔިތުންނަށް ސީދާ މަންފާކުރާނެ ކަންތައްތަކެވެ. ބްރިޖުން ގުޅުވައިލެވުނު ރަށްތަކުގެ ސަބަބުން ދަތުރުފަތުރާއި ވިޔަފާރިއަށް ލުއިފަސޭހަކަން ލިބުނެވެ. ހިލޭ ޑިގްރީ ޕްރޮގްރާމްތަކުގެ ސަބަބުން ތަޢުލީމީ ފުރުޞަތުތައް ފުޅާވެގެން ދިޔައެވެ. އާރު.ޓީ.އެލްގެ ސަބަބުން ރަށްރަށުގެ މެދުގައި ގުޅުން ބަދަހިވެ، އައު ވިޔަފާރިތަކަށް މަގުފަހިވިއެވެ.
ވެރިކަމެއްގެ ކާމިޔާބީ މިނެކިރަންވާނީ މިފަދަ ޢަމަލީ ނަތީޖާތަކުންނެވެ. ހަމައެކަނި ބައްދަލުވުންތަކުގެ އަދަދާއި ނިންމުންތަކުގެ އަދަދަކުން ނޫނެވެ. ރައްޔިތުންގެ ދިރިއުޅުމަށް އައި ހެޔޮ ބަދަލުތަކުންނެވެ. އެހެންކަމުން، މި ސަރުކާރުގެ ކާމިޔާބީ ވަޒަންކުރާއިރު ބަލަންވާނީ ރައްޔިތުންނަށް ކުރާ އަސަރަށެވެ. ޙަޤީޤީ ތަރައްޤީއަށެވެ. ރައްޔިތުންނަށް ލިބޭ ތަނަވަސްކަމަށެވެ.
ކޮންމެ ސަރުކާރެއްގައިވެސް ރަނގަޅު ކަންތައްތަކާއި، އިޞްލާޙުކުރަންޖެހޭ ކަންތައްތައް ހުންނާނެއެވެ. މުހިންމީ ވެރިކަމުގެ ކާމިޔާބީ ވަޒަންކުރާއިރު ހަމަހަމަ އަދި ޢަދުލުވެރި މިންގަނޑަކުން ބެލުމެވެ. ރައްޔިތުންނަށް ލިބޭ ނަފާއަށް އިސްކަންދިނުމެވެ.
މުއިއްޒުގެ ވެރިކަމުގެ 8 މަސް ނިމިގެން ދިޔައީ، އެއްވެސް އަމަލީ މާނަވީ މަސައްކަތެއް ނުކުރެވިއެވެ. މީޓިންގ ތަކެއްގެ ވާހަކަ ދައްކަން ޖެހުނީ އެހެންވެއެވެ. ކޮންމެ ވެރިއަކަށްވެސް، ޑިރެކްޓަރުން ލެވެލްގައި މުއައްސަސާތަކުގައި ނިންމާ ކަންކަން ކެބިނެޓަށް ގެނެސް ކެބިނެޓުގައި އެކަންކަން ނިންމި ދާނެއެވެ. މުއިއްޒު ކުރެއްވި ކަމަކީ އެއީއެވެ. އިތުރު ކަމެއް ނުކުރައްވައެވެ. 8 މަސް ނިމިގެން މި ދިޔައީ ހަމަ އެއްވެސް ކަމެއް ނުކުރެވިއެވެ.