މިއަދު އަޅުގަނޑުމެންގެ މުޖުތަމަޢުގައި ވަރަށް ބޮޑަށް ޢާންމުވެފައިވާ ނުރައްކާތެރި ވަބާއެއް އެބައޮތެވެ. އެއީ ސިޔާސީ ވޯޓު ގަތުމާއި ވިއްކުމުގެ ވަބާއެވެ. މީގެ ތެރެއިންވެސް އެންމެ ނުރައްކާތެރި އެއް ކަމަކީ ވަޒީފާ ދީގެން ވޯޓު ގަތުމެވެ. ބައެއް މީހުން ހީކުރެއެވެ. ފައިސާ ނަގައިގެން ވޯޓު ވިއްކުން ޙަރާމް ވިއަަސް، ވަޒީފާއެއް ހޯދައިގެން ވޯޓު ދިނުމަކީ އެއީ ދިރިއުޅުމަށް ހަލާލު މަސައްކަތެއް ހޯދުމެވެ. ނަމަވެސް އެއީ މުޅިން ކުށްހީއެކެވެ. އިސްލާމީ ޝަރީޢަތުގެ ޙުކުމުގައި ރިޝްވަތުގެ ޞޫރަ (ސިފަ) ބަދަލުވުމަކުން ޙުކުމެއް ބަދަލެއް ނުވެއެވެ. މި ލިޔުމުގައި ﷲ ގެ ވާގިފުޅާއެކު މި މައުޟޫޢު ތަފްޞީލުކޮށް ބަޔާންކޮށްދެވޭތޯ ބަލާނަމެވެ.
ރިޝްވަތަކީ ކޮބައި؟
ރިޝްވަތަކީ ޙައްޤު ނޫން ގޮތުގައި ކަމެއް ޙާޞިލުކުރުމަށް ނުވަތަ ބާޠިލް ކަމެއް ޤާއިމުކުރުމަށް ދެވޭ ކޮންމެ އެއްޗެކެވެ. އެއީ ފައިސާ ކަމުގައި ވިޔަސް، ވަޒީފާ ކަމުގައި ވިޔަސް، ބިމެއް ކަމުގައި ވިޔަސް، ނުވަތަ ޚިދުމަތެއް ކަމުގައި ވިޔަސް ޙުކުމަކީ އެކައްޗެކެވެ. ރިޝްވަތަކީ އިސްލާމް ދީނުގައި ވަރަށް ބޮޑަށް ޙަރާމް ކުރައްވާފައިވާ ކަމެކެވެ. ﷲ سبحانه وتعالى ވަޙީކުރައްވާފައިވެއެވެ:
(188) އޭ مؤمن ންނޭވެ! ކަލޭމެން އެއްބަޔަކުގެ މުދާ ބާތިލު ގޮތުގައި އަނެއްބަޔަކު ކައި ނުހަދާށެވެ! އެއީ ޙައްޤު ނޫން ހުރިހާ ރޮނގަކުންނެވެ. އަދި މީސްތަކުންގެ މުދަލުގެ ތެރެއިން ބައެއްތަކެތި ފާފަވެރިވެވޭނޭގޮތުން ކެއުމަށްޓަކައި ބޭނުންކުރުމަށްޓަކައި ރިޝްވަތު ގެގޮތުގައި ޤާޒީންނަށް ނުވަތަ އެ މަޤާމެއްގައިވާ އެއްވެސް މީހަކަށް ދީނުހަދާށެވެ! އެއީ ކަނޑައެޅިގެން ނުބައިކަމެއްކަން ކަލޭމެނަށް އެނގޭ ޙާލު އެފަދަ ކަންތައް ނުކުރާށެވެ!
[ސޫރަތުލް ބަޤަރާ 2:188
އަދި ރަސޫލުﷲ صلى الله عليه وسلم ޙަދީޘްކުރައްވާފައިވެއެވެ:
ރިޝްވަތު ދޭ މީހާއާއި ރިޝްވަތު ހިފާ މީހާއަށް ﷲ ލަޢުނަތް ލައްވައެވެ.
[ސުނަން އަބޫ ދާވޫދު، ސުނަން ތިރްމިޛީ
އެހެން ހަދީސެއްގައި ތިންވަނަ ފަރާތެއް ވެސް ހިމަނުއްވާފައިވެއެވެ:
...އަދި އެ ދެމެދުގައި މެދުވެރިޔަކަށް ވާ މީހާއަށް ވެސް (ލަޢުނަތް ލައްވައެވެ).
[މުސްނަދު އަޙްމަދު
ވިސްނައްވާށެވެ! ލަޢުނަތް ލެއްވުމުގެ މާނައަކީ ﷲ ގެ ރަޙްމަތުން ބޭރުކުރެއްވުމެވެ. މިއީ ކުޑަ ކަމެއް ނޫނެވެ. ރިޝްވަތާ ގުޅޭ ތިން ފަރާތް — ރިޝްވަތު ދޭ މީހާ، ރިޝްވަތު ހިފާ މީހާ، އަދި މެދުވެރިޔާ މި އެންމެންގެ މައްޗަށް ﷲ ގެ ލަޢުނަތް ވެއެވެ.
ވަޒީފާ ދީގެން ވޯޓު ގަތުން: ޝަރުޢީ ގޮތުން ބެލުން
ފުރަތަމައީ: ރިޝްވަތުގެ ބާވަތް ބަދަލުވުމަކުން ޙުކުމެއް ބަދަލު ނުވާ ނުވުމެވެ.
އިސްލާމީ ފިޤުހުގެ ޤާއިދާއެއް ބުނާ ގޮތުން "ޙުކުމް ބިނާވާނީ ޙަޤީޤަތުގެ (معنى) މައްޗަށެވެ. ޞޫރައިގެ (ސިފައިގެ) މައްޗަކަށް ނޫނެވެ." (العبرة بالحقيقة لا بالصورة) ވީމާ ރިޝްވަތުގެ "ބައްޓަން" ބަދަލުވުމަކުން އޭގެ ޙަޤީޤަތަކަށް ބަދަލެއް ނާދެއެވެ.
ބައެއް މީހުން ރިޝްވަތުގައި ނުޖެހުމަށް ވޯޓަށް ފައިސާ ބޭނުން ނޫން ކަމަށް ބުނެއެވެ. އޭގެ ބަދަލުގައި ވަޒީފާ އެއް ހަމަޖައްސަ ދިނުމަށް އެދެއެވެ. އެ މީހާ ހީކުރަނީ ފައިސާގެ ބަދަލުގައި ވަޒީފާ ނެގީމާ ރިޝްވަތުގެ ޙުކުމުން ބޭރުވީ ކަމަށެވެ. ނަމަވެސް ޙަޤީޤަތުގައި މިއީ ރިޝްވަތުގެ އެންމެ ނުރައްކާތެރި ޞޫރަ (ސިފަ) އެވެ. ސަބަބަކީ:
ފައިސާއިން ދޭ ރިޝްވަތެއް ވެއްޖެއްޔާ އެއް ފަހަރު ފައިސާ ކޮޅެއް ނެގީއެވެ. ނިމުނީއެވެ.
ނަމަވެސް ވަޒީފާ ވެއްޖެއްޔާ ކޮންމެ މަހެއްގެ މުސާރައިން ޙަރާމް ފައިސާ ކެވެނީއެވެ. ކޮންމެ މަހަކު ޙަރާމް ތަކުރާރުވަނީއެވެ.
ޢާންމު ވަޒީފާތަކަކީ އަމާނާތެއް
ޢާންމު ވަޒީފާތަކާއި ސަރުކާރުގެ މަޤާމުތަކަކީ އިސްލާމް ދީނުގައި ވަރަށް ބޮޑު އަމާނާތެކެވެ. ރަސޫލުﷲ صلى الله عليه وسلم ޙަދީޘްކުރައްވާފައިވެއެވެ:
"އަމާނާތް ގެއްލިއްޖެ ހިނދު ޤިޔާމަތަށް އިންތިޒާރު ކުރާށެވެ." ޞަޙާބީ ބޭކަލަކު ދެންނެވިއެވެ: "އެ ގެއްލޭނީ ކިހިނެއް ހެއްޔެވެ؟" ޙަދީޘް ކުރެއްވިއެވެ: "އެކަމުގެ (ޤާބިލު) އަހުލުވެރިން ނޫން ބަޔަކާ ކަންކަން ޙަވާލުކުރެވޭ ހިނދުއެވެ."
[ޞަޙީޙުލް ބުޚާރީ
މި ޙަދީޘުން ވަރަށް ސާފުކޮށް އެނގެނީ ވަޒީފާ ދޭންޖެހެނީ އެ ވަޒީފާއަށް ޤާބިލު، ޝަރުޠު ހަމަވާ، އެކަމުގެ އަހުލުވެރިންނަށް ކަމެވެ. ޕާޓީއަށް ވޯޓު ގަނެދޭ ނުވަތަ ވޯޓުދޭ މީހުންނަކަށް ނޫނެވެ. ވޯޓު ހޯދައިދޭ މީހާއަށް ވަޒީފާ ދީ، އެކަމަށް ޙައްޤު، ޤާބިލު މީހާ ބާކީ ކުރުމަކީ ﷲ ގެ ޙަޟްރަތުގައި ވަރަށް ބޮޑު ޚިޔާނާތެކެވެ.
މި ޙަދީޘަކީ އިސްލާމީ ސިޔާސީ ޢިލްމާއި، އަދި އިދާރީ އަޚްލާޤިއްޔާތުގެ ދާއިރާގައި ވަރަށް ގިނައިން ބޭނުންކުރާ ޙަދީޘެކެވެ. މީގެ ބޭނުމަކީ، ޤާބިލުކަމަށް ބެލުމުގެ ބަދަލުގައި، އާއިލީ ގުޅުމަށް ނުވަތަ ވަކި ފަރާތަކަށް ޖެހިގެން (nepotism or favoritism) މީހުންނަށް މަޤާމުތައް ދިނުމަކީ، މުޖުތަމަޢުގެ އަޚްލާޤީ އަދި އިޖުތިމާޢީ ބަހާތައް އޮޔާގޮސް ފަސާދަވަމުންދާކަމުގެ ނިޝާނެއްކަން ބަޔާންކޮށްދިނުމެވެ.
ވޯޓަކީ އިސްލާމީ ނަޒަރަކުން ދެވޭ ހެކިބަހެއް
ވޯޓަކީ ޝަރުޢީ ގޮތުން ބާލާއިރު ހެކިބަހުގެ ދަރަޖައިގައި ހިމެނޭ ކަމެކެވެ. ވޯޓެއް ދޭ ހިނދު ތިމާ އެ ހެކިބަސް ދެނީ މި ކެންޑިޑޭޓަކީ މި މަޤާމަށް އެންމެ ޤާބިލު އެންމެ ރަނގަޅު މީހާ ކަމަށެވެ. ވީމާ ވަޒީފާއަކަށްޓަކައި ނުވަތަ ދުނިޔެވީ ކޮންމެވެސް މަންފާއަކަށްޓަކައި ވޯޓު ވިއްކުމަކީ ދޮގު ހެކިބަސް ދިނުން ފަދަ ކަމެކެވެ. ދޮގު ހެކިބަހަކީ ބޮޑެތި ފާފަތަކުގެ ތެރެއިން ހިމެނޭ ކަމެކެވެ. ﷲ سبحانه وتعالى ވަޙީކުރައްވާފައިވެއެވެ:
"...ތިޔަބައި މީހުން ބުދަށް އަޅުކަން ކުރުމުން ދުރުވެގަންނާށެވެ. އަދި ދޮގު ބަސް ބުނުމުން (ދޮގު ހެކިބަސް ދިނުމުން) ދުރުހެލިވެގަންނާށެވެ..."
[ސޫރަތުލް ޙައްޖު 22:30
ވަޒީފާގެ މުސާރައާ ބެހޭ ގޮތުން: ނަރަކައިގެ އަލިފާން ކެއުން
ރިޝްވަތުގެ ބަދަލެއްގެ ގޮތުގައި ލިބުނު ވަޒީފާއިން ކޮންމެ މަހަކު ލިބޭ މުސާރައިގެ ޙުކުމަކީ ކޮބައި ހެއްޔެވެ؟
ޢިލްމުވެރިން ވިދާޅުވާ ގޮތުގައި، ވަޒީފާ ލިބުމުގެ އަސާސަކީ ރިޝްވަތު (މިސާލަކަށް ވޯޓު ވިއްކުން) ކަމުގައި ވެއްޖެނަމަ، އެ ވަޒީފާގެ ބިންގާ އެޅިފައި ވަނީ ޙަރާމް ކަމެއްގެ މައްޗަށެވެ. އެހެންކަމުން އެ ވަޒީފާ ކިތަންމެ ރަނގަޅަށް އަދާކުރިއަށް ވަޒީފާއިން ލިބޭ އާމްދަނީއަކީ ޙަރާމް ނުވަތަ އެންމެ ކުޑަމިނުން ޝުބުހައިގެ ތެރޭގައި ވާ ފައިސާއެވެ.
މިއީ ކަޢުބު ބިން ޢުޖްރާ (رضي الله عنه) ގެ ކިބައިން ރިވާވެގެންވާ ވަރަށް މުހިންމު ނަޞޭޙަތްތަކެއް އެކުލެވޭ ޙަދީޘެކެވެ.
ކަޢުބު ބިން ޢުޖްރާ (رضي الله عنه) ރިވާކުރެއްވިއެވެ:
ކީރިތި ރަސޫލާ ﷺ ތިމަންކަލޭގެފާނަށް ޙަދީޘްކުރެއްވިއެވެ:
"އޭ ކަޢުބު ބިން ޢުޖްރާއެވެ! ތިމަންކަލޭގެފާނަށްފަހު އަންނާނެ (އަނިޔާވެރި) ވެރިންގެ ކިބައިން ތިބާ ސަލާމަތްކޮށްދެއްވުން އެދި ﷲ ގެ ޙަޟްރަތުން ދަންނަވަމެވެ. ފަހެ، އެބައިމީހުންގެ ގާތަށް ގޮސް، އެބައިމީހުން ހަދާ ދޮގުތައް ތަޞްދީޤުކޮށް (އެއީ ތެދުކަމަށް ބުނެ)، އަދި އެބައިމީހުންގެ އަނިޔާވެރިކަމަށް އެހީތެރިވެދޭ މީހަކީ ތިމަންކަލޭގެފާނުގެ މީހެއް ނޫނެވެ. އަދި ތިމަންކަލޭގެފާނު އެމީހެއްގެ މީހަކު ކަމުގައިވެސް ނުވަމެވެ. އަދި އެމީހަކަށް (ޤިޔާމަތްދުވަހުން) ޙައުޟުލް ކައުޘަރުގެ ކައިރިއަކަށް ނާދެވޭނެއެވެ.
އަދި އެބައިމީހުންގެ ގާތަށް ގޮސް (ނުވަތަ ނުގޮސް ނަމަވެސް)، އެބައިމީހުންގެ އިތުރުފުޅުތައް ތަޞްދީޤު ނުކޮށް، އަދި އެބައިމީހުންގެ އަނިޔާވެރިކަމަށް އެހީތެރިނުވާ މީހަކީ، އެއީ ތިމަންކަލޭގެފާނުގެ މީހެކެވެ. އަދި ތިމަންކަލޭގެފާނު އެމީހެއްގެ މީހަކު ކަމުގައި ވަމެވެ. އަދި އެމީހަކު (ޤިޔާމަތްދުވަހުން) ތިމަންކަލޭގެފާނާ ޙައުޟުލް ކައުޘަރުގެ ކައިރިން ބައްދަލުވާނެއެވެ.
އޭ ކަޢުބު ބިން ޢުޖްރާއެވެ! ނަމާދަކީ (އީމާންކަމުގެ) ސާފު ހެއްކެކެވެ. އަދި ރޯދައަކީ (ނަރަކައިން ރައްކާތެރިކޮށްދޭ) ވަރުގަދަ އައްޑަނައެކެވެ. އަދި ފެނުން އަލިފާން ނިއްވާލާ ފަދައިން، ޞަދަޤާތަކީ ފާފަތައް ފޮހެލައި ނިއްވާލާ އެއްޗެކެވެ.
އޭ ކަޢުބު ބިން ޢުޖްރާއެވެ! ޙަރާމް ގޮތުގައި ހޯދާ މުދަލުން (ސުޙްތުން) އުފެދިފައިވާ ކޮންމެ މަސްގަނޑެއް (ހަށިގަނޑެއް)، ނަރަކައިގެ އަލިފާން އެއަށް އައުލާކަން ބޮޑެވެ."
[ސުނަން ތިރްމިޛީ / ބައެއް ރިވާޔަތުގައި މުސްނަދު އަޙްމަދު
ވިސްނައްވާށެވެ! ރިޝްވަތުގެ ގޮތުގައި ލިބުނު ވަޒީފާއިން ލިބޭ މުސާރައިން ކެއީމާ، އެ ކެއި ކެއުމުން ހެދޭ ހަށިގަނޑު ހެދެނީ ޙަރާމުންނެވެ. އެ ޙަރާމުން ހެދޭ ހަށިގަނޑަށް އެންމެ އައުލާ ކަން ބޮޑީ ނަރަކައިގެ އަލިފާނެވެ. މިއީ ހަމައެކަނި ތިމާގެ ނަފުސަށް ހުރި ގެއްލުމެއް ނޫނެވެ.
އަނބިދަރިންނަށް ކާން އެދެވެނީ ނަރަކައިގެ އަލިފާން!
ތިމާ ވޯޓު ވިއްކައިގެން ހޯދި ވަޒީފާއިން ލިބޭ މުސާރައިން ގެއަށް ކާ އެއްޗެހި ގަނެ، ދަރީންނަށް ކާންދީ، އަނބިމީހާއަށް ޚަރަދުކުރާ ހިނދު، ތިމާ ތިޔަ ކާންދެނީ ޙަރާމް ތަކެއްޗެވެ. ތިމާގެ ލޯބިވާ ދަރީންނާއި އާއިލާ ބަނޑުފުރާ އެ ކަނީ ނަރަކައިގެ ކާނާއެވެ.
ރަސޫލުﷲ صلى الله عليه وسلم ޙަދީޘްކުރައްވާފައިވާ ފަދައިން:
"ﷲ އީ ޠައްޔިބު (ރަނގަޅު ޠާހިރު) ޒާތެވެ. އަދި ޠާހިރު އެއްޗެއް ނޫނީ އެކަލާންގެ ޤަބޫލެއް ނުކުރައްވައެވެ."
[ޞަޙީޙް މުސްލިމް
ޙަރާމް ފައިސާއިން ކައިގެން ކުރާ އަޅުކަން ﷲ ގެ ޙަޟްރަތުގައި މަޤުބޫލު ވާނެ ހެއްޔެވެ؟ ބައްޕައެއްގެ ހައިސިއްޔަތުން ނުވަތަ ފިރިއެއްގެ ހައިސިއްޔަތުން ތިމާގެ ލޯބިވާ ޢާއިލާއަށް ނަރަކައިގެ އަލިފާން ކާންދޭން ހެޔޮވާނެ ހެއްޔެވެ؟
މި ރިޝްވަތުގެ މުޢާމަލާގައި ބައިވެރިވާ ހުރިހާ ފަރާތަކީ ވެސް ފާފަވެރި ފަރާތްތަކެވެ:
1. ސިޔާސީ ޕާޓީ / ކެންޑިޑޭޓް (ރިޝްވަތު ދޭ ފަރާތް — الرَّاشِي)
މީސްތަކުންނަށް ވަޒީފާ ދީގެން ވޯޓު ގަންނަ ސިޔާސީ ފަރާތްތައް ކުރަނީ ދެ ބޮޑު ފާފައެކެވެ. ރިޝްވަތު ދިނުމާއި، ރައްޔިތުންގެ ފައިސާއިން (ޓެކްސް ފައިސާއިން) ހިންގާ ޢާންމު ވަޒީފާތައް ނާޖާއިޒު ގޮތުގައި ބޭނުންކުރުމެވެ. ޤިޔާމަތް ދުވަހު ﷲ ގެ ޙަޟްރަތުގައި މި ހުރިހާ ރައްޔިތުންގެ ޙައްޤާ ބެހޭ ގޮތުން ސުވާލު ކުރެވޭނެއެވެ.
2. ވޯޓު ވިއްކާ މީހާ (ރިޝްވަތު ހިފާ ފަރާތް — المُرْتَشِي)
"ތިމަންނައަށް ވަޒީފާ ދީ، ވޯޓު ދޭނަން" ކިޔައި ވޯޓު ވިއްކާ މީހާ ކުރަނީ ތިން ކަމެކެވެ:
- ރިޝްވަތު ހިފުން — ﷲ ގެ ލަޢުނަތް ލައްވާ ކަމެއް
- ވޯޓުގެ އަމާނާތަށް ޚިޔާނާތްތެރިވުން — ވޯޓަކީ ހެކިބަހެއް ކަމުގައިވާއިރު އެ ވިއްކީ
- ދޮގު ހެކިބަސް ދިނުން — ތިމާ ޤަބޫލުކުރާ ކެންޑިޑޭޓް ދޫކޮށް ފައިސާ/ވަޒީފާ ދިން ކެންޑިޑޭޓަށް ވޯޓު ދިނީ
3. މެދުވެރިން / ބްރޯކަރުން (الرَّائِشُ)
ކެމްޕެއިން ތެރޭގައި "ކަލެއަށް ވަޒީފާ ހޯދައިދީފާނަން، ވޯޓު ދީ" ކިޔައި މެދުވެރިވާ މީހުން — ޙަދީޘްގައި ހާމަކޮށްފައިވާ ތިންވަނަ ފަރާތް — މިމީހުންނަށް ވެސް ﷲ ގެ ލަޢުނަތް ވެއެވެ.
ދެކޮޅު ނުހެދެވޭނެ ޙަޤީޤަތެއް: ޤާބިލު މީހާގެ ޙައްޤު ނިގުޅައިގަތުން
ވޯޓު ގަނެދޭ މީހާއަށް ވަޒީފާ ދިނުމުގެ ނަތީޖާއަކީ އެ ވަޒީފާއަށް ޙައްޤުވެރި، ޤާބިލު، ތަޢުލީމީ ޒުވާނާ ނުވަތަ ތަޖުރިބާކާރު މީހާ ބާކީ ކޮށްލެވުމެވެ. މިއީ އިސްލާމް ދީނުގައި ޡުލްމް (އަނިޔާ) ގެ ތެރޭގައި ހިމެނޭ ކަމެކެވެ.
ﷲ سبحانه وتعالى ވަޙީކުރައްވާފައިވެއެވެ:
"ހަމަކަށަވަރުން ﷲ ތިޔަބައިމީހުންނަށް އަމުރުކުރައްވަނީ އަމާނާތްތައް އޭގެ އަހުލުވެރިންނަށް (ޙައްޤުވެރިންނަށް) އަދާކުރުމަށެވެ."
[ސޫރަތުއް ނިސާ 4:58
ވަޒީފާގެ އަމާނާތް އެ ވަޒީފާގެ ޙައްޤުވެރިންނާ ޙަވާލުނުކޮށް ޕާޓީގެ ވޯޓު ގަންނަ މީހުންނާ ޙަވާލުކުރުމަކީ މި އާޔަތާ ޞަރީޙަ ގޮތެއްގައި ޚިލާފު ކަމެކެވެ.
"ތިމަންނައަށް މަޖުބޫރު، ބޭނުންވީ ވަޒީފާ" — ޢުޒުރެއް ނޫން!
ބައެއް މީހުން ބުނެ އުޅެއެވެ: "ތިމަންނައަށް ވަޒީފާ ބޭނުމެވެ. އެ ނޫން ގޮތެއް ނެތެވެ. މަޖުބޫރީއެވެ." ނަމަވެސް ﷲ ގެ ޙަޟްރަތުގައި ޙަރާމް ގޮތެއް ޚިޔާރުކުރުމަށް ދުނިޔެވީ ބޭނުންތަކެއް ޢުޒުރެއް ނުވާނެއެވެ. ﷲ سبحانه وتعالى ވަޙީކުރައްވާފައިވެއެވެ:
".... اللَّهُ އަށް ތަގުވާ ވެރިވެއްޖެ މީހާއަށް އެނާ އަށް ޖެހިފައިވާ އުނދަގުލާ ދަތިން ނުކުންނާނެ ކޮންމެވެސް މަގެއް اللَّهُ ލައްވާ ހުއްޓެވެ."
[ސޫރަތުއް ޠަލާޤު 65:2-3
ﷲ އަށް ބިރުވެތިވެ ޙަރާމް ގޮތް ދޫކޮށްލައިފިނަމަ، ﷲ ހީވެސް ނުކުރާ ގޮތަކުން ރިޒުޤު ދެއްވާނެއެވެ. ޙަރާމް ވަޒީފާ ނެގީމާ ﷲ ގެ ރަޙްމަތުން ބޭރުވީއެވެ. ހީކުރީ ރިޒުޤު ލިބުނީ ކަމަށެވެ. ނަމަވެސް ޙަޤީޤަތުގައި ލިބުނީ ﷲ ގެ ލަޢުނަތެވެ.
މި ޢަމަލު މުޖުތަމަޢަށް ކުރާ ނޭދެވޭ އަސަރު
ވަޒީފާ ދީގެން ވޯޓު ގަތުމުގެ ނޭދެވޭ އަސަރު ހަމައެކަނި ފާފައެއްގެ ގޮތުގައި ނިމެނީއެއް ނޫނެވެ. މުޅި މުޖުތަމަޢުއަށް އޭގެ ނޭދެވޭ އަސަރު ފޯރައެވެ:
- ޤާބިލު ނޫން މީހުން މަޤާމުތަކުގައި — ރައްޔިތުންނަށް ލިބެންޖެހޭ ޚިދުމަތުގެ ފެންވަރު ދަށްވޭ
- ޤާބިލު ޒުވާނުން ގޮތް ހުސްވެ — ޙައްޤު އޮތް މީހާ ވަޒީފާ ނުލިބި ބާކީވޭ
- ކޮރަޕްޝަން ފެތުރި — މުޅި ނިޒާމު ފާސިދުވޭ
- އިޤުތިޞާދީ ބޮޑެތި ގެއްލުން — ނާޤާބިލު މީހުން ޒިންމާދާރު މަޤާމުތަކުގައި ތިބުމުގެ ސަބަބުން
- ރައްޔިތުންގެ ފައިސާ ބޭކާރުވެ — ވަޒީފާ ދެވެނީ ޚިދުމަތަކަށް ނޫން، ވޯޓު ގަތުމަށް
ރަސޫލުﷲ صلى الله عليه وسلم ޙަދީޘްކުރައްވާފައިވެއެވެ:
"ތިމާގެ (ބެލުމުގެ ދަށުގައިވާ) ރައްޔިތުންނަށް މަކަރާއި ޙީލަތް ހެދި ވެރިއެއް ﷲ އެ ވެރިއެއްގެ މައްޗަށް ސުވަރުގެ ޙަރާމް ކުރައްވައެވެ."
[ޞަޙީޙް މުސްލިމް / ޞަޙީޙުލް ބުޚާރީ
ނިންމުން
ލޮބުވެތި މުސްލިމް އަޚުންނާއި އުޚުތުންނޭވެ! ﷲ އަށް ބިރުވެތިވާށެވެ! ވޯޓު ވިއްކައި ވަޒީފާ ހޯދުމަކީ ތިމާއަށާއި ތިމާގެ ޢާއިލާއަށް ދުނިޔެއާއި އާޚިރަތުގައި ގެއްލުންހުރި ކަމެކެވެ.
ވޯޓަކީ ﷲ ތިމާއާ ޙަވާލުކުރައްވާފައިވާ އަމާނާތެކެވެ. އެ އަމާނާތަށް ޚިޔާނާތްތެރި ނުވާށެވެ. ވަޒީފާ ދޭ ކެންޑިޑޭޓަށް ޖަހަންވީ ނޫނެކެވެ. ﷲ ގެ ޙަޟްރަތުގައި ތެދުވެރި ހެކިބަހެއް ދީ، ޤައުމާއި ރައްޔިތުންނަށް އެންމެ ފައިދާ ބޮޑު، އެންމެ ޤާބިލު ކެންޑިޑޭޓަކަށް ނުވަތަ ކަމަކަށް ވޯޓު ދޭށެވެ.
ރިޝްވަތުގެ ސިފަ ބަދަލުކުރުމަކުން، ފައިސާގެ ބަދަލުގައި ވަޒީފާ ނެގުމަކުން ﷲ ގެ ޙުކުމްފުޅު ބަދަލެއް ނުވާނެއެވެ. ރިޝްވަތު ދޭ މީހާ، ރިޝްވަތު ހިފާ މީހާ، އަދި ދެމެދުގައި މެދުވެރިވާ މީހާ — މި ތިން މީހުންގެ މައްޗަށް ﷲ ގެ ލަޢުނަތް ވެއެވެ.
ތިމާގެ ދަރީންނަށް ކާންދޭން ގެއަށް ގެންދާ ފައިސާއަކީ ޙަލާލު ފައިސާ ކަމުގައި ހަދާށެވެ. އެ ދަރީންނަށް ނަރަކައިގެ އަލިފާން ކާން ނުދޭށެވެ.
ﷲ އަޅުގަނޑުމެން އެންމެންނަށް ހެޔޮ ވިސްނުން ދެއްވައި، ޙަރާމް ކަންކަމުން ދުރުހެލިވުމުގެ ތައުފީޤު ދެއްވާށި! آمين